الساعة..

بسم الله الرحمن الرحيم



السلام عليكم ورحمة الله وبركاته

أرجو تفسير رؤياي جزاك الله كل خير ..



رأيت كأني أنا أمي في السوق وأمي تبغانا ندخل محل العربيه للعود ، قلت يوووه ما أحبه هالمحل ، دخلناه قلت لامي هو العطر اللي ريحته حلوه اذكر شكله ولونه وردي تعالي نشوفه ، وكان المحل زحمه مليان حريم وكأن ماعندهم نية شراء بس مسوين زحمه ، تضايقت من الزحمه ورحت بسرعه للي يبيع نادى خويه اللي معاه علشان يشوف اللي ابي وهالحريم يطالعوني يوم رحت بسرعه اكلمه قلت له الله يعطيك العافيه عطني هذا العطر واشرت بشكل عشوائي على الرفوف على اساس اني لامحه العطر اللي ابيه هنا بس مالقيته ، قال وين قلت هذا اخترت عطلر ثاني ما اعرفه بس علشان ما افشل نفسي ، يوم عطاني اياه تفآجأت اني كيس شبس الحجم الكبير كنت مصدومه وش جاب الشيبس لمحل عطور !!!! يوم طالعت الا فعلا جههة من المحل اكتشفت انه موجود اشياء مثل كذا بس مدري وش جاب هالحبه مع رف العطور ، فتحت الشيبس علشان اتذوقه انا وامي كان طعمه الذ شيبس ذقته بحياتي ناطع على حالي ع بهارات وماكان فيه الا هالحبه اعجبني مرره قلت خلاص بآخذه ، الا شوي كأننا في نفس المحل او فرعه له المهم محل عطور بس كأني اشوفه محل اقمشه !!!مدري هل العطور كانت على جنب ما اذكر ! المهم ان المحل مو نفس الاول مليان ناس واللي يبيعون اكثر من واحد ، لا هذا كان مافيه الا شخص واحد يبيع ، كان يطالعنا واحنا معنا الشيبس مفتوح يقول كيف فتحتوه وانتوا ماحسبتوا مستغرررب جدا قلت عادي احاسب عليه وهو مفتوح حتى لو فاضي راح احاسب عليه ، الا اشوف على الرف علبه عطر زرقاء لامعه مثل لمعه جلد السمك اخذتها ويوم فتحناها اشوف فيها ساعه !!! قالت امي مررره حلوه وانا اعجبتني جدا كأن عليها يا الماس او زركون ما اذكر وسيرها جلد لونه اخضر غامق خامته مثل جلد الافعي لما لبستها كانت جمييييله جدا على يدي صايره يدي اسمن و احلى وابيض من الواقع حتى امي اعجبتها تقول مره حلوه وغريبه عليك ،(فعلا انا ماقد شريت ساعه نفس هاللون )المهم وانا اطالعها صار جلد الساعه كأنه مخمل مو جلد الا طالعت في العلبه واكتشفت ان مع الساعه ثلاث سيور اقدر اغيرها ع نفس الساعه واحد اخضر غامق والثاني ازرق نيلي كانت رفيعه مو عريضه كأنها خامة جلد الافعى والثالثه سوارة مخمل نصفها ازرق والنصف الثاني اخضر وكانت عريضه جدا ومتينه ، لما لبستها كان شكلها حلو بس لا حظت انو بين اللون الازرق والاخضر الساعه نفسها بس انها داخله مخفيه مايبين ان فيها ساعه ، استغربت من الحركه قالت امي حلووو فكرتها يبغونها 2 في واحد شكل اسواره ولين بغيتي تعرفين كم الساعه تفتحينها تشوفين كم الساعه (طبعا نظامها تنفتح بصعوبه يادوب تشوف الساعه ويرجع يتقفل عليها القماش ) وكان في التسكيره حق الساعه شكل قفل صغير معلق كأنه ميداليه لونه ذهبي ، الا تشوف امي جنب علبة هالساعه اللي اخذتها كيس ابلاستيك مقوي لونه ازرق لما اخذته كان نفس شكل الساعه اللي اعجبتني بس هذي معها فقط سيرواحد وسوارة فضيه يعني مجموع اللي فيها 2 مو مثل هذيك 3 المهم ما اعجبتني ابدا مع انها ارخص من هذيك رجعتها على الرف واخذت الاولى ، بعدين فجاة كأني لازلت جالسه بالمحل على كرسي انا وامي وانا جالسه اتامل بالساعه زكأن لنا وقت طويل !!!! التفت الا اشوف امي غافيه تفاجئت من وضعنا وش جالسين ننتظر هنا المفروض حاسبنا عليها وطلعنا ، صحيت امي من غفوتها وانا توني باروح احاسب الا سبقوني 3 حريم توهم داخلين المحل وعلطول راح للي يبيع اعتقد يسالونه عن شي تفشلت اجي قدامهم رجعت اجلس لين يروحون وكنت متضايقه اقول في نفسي كان المفروض مخلصين وطالعين مو الحين قاعدين ننتظر ، واشوف هالحريم كل شوي يطالعونا انا وامي ماحبيت نظرتهم بس ما اعرفهم واصلا هم بعباياتهم ..



منفصله من 3 سنوات تقريبا وعندي ولد

موظفه ...

الله يعطيني خير هالرؤيا وخير مافيها والله يصرف عني شرها وشر مافيها ...

والله يجزاك خير ويوفقك لما يحب ويرضى ..

وعليكم السلام ورحمة الله وبركاته
أختي الفاضلة الكريمة يدل مجمل الحلم على أنه ستكون هناك مناسبة سعيدة قريبة
وقد تكون مناسبة مميزة
وهناك من النساء الفضوليات من الأقارب أو المعارف متابعين أخباركم
والله تعالى أعلى وأعلم