رؤيا لي..

السلام عليكم ورحمة الله وبركاته
أتمنى لكم دوام الصحة والعافية ..

رأيت كأني أنا وأمي رايحين خارج الرياض عند خالي الصغير (ع – عمره اعتقد في الأربعين – عنده 3 بنات واربعة أولاد ) وكان مودينا أخوي (ع – طالب جامعي -20سنه تقريبا ) وأحنا واقفين عند بيت خالي نبغى ننزل من السياره الا جانا خالي وكان واقف عند بابي وشباكي مفتوح ويهلي ويسلم على امي وهي في السياره من عند شباكي ويطالعني يبي يسلم علي وأنا ابغى بسرعه البس ابني جزمته اعزك الله وهو كانه ينتظرني انحرجت منه وبسرعه لبست ابني ونزلت ، وأخذني بالأحضان كان حاضني بقووه وداخل فيني البيت وهو حاضني (مع اني للأسف من زمان ماشفته اذا رحنا مانصادفه ) المهم الا أشوف ابنه الكبير (أ- عمره 25 – متزوج من بنت بنت خالتي يعني تصير بنت بنت عمته – خدوووم جدا جدا جدا وأكثر شخص وواصل معنا ومع الكل والله لازم بين فتره وفتره يمر يسلم علينا اول كنا احنا وبنات خالاتي واخواني نسميه أخو الكل لابنات ولا أولاد ماشاء الله عليه ) المهم دخل بي خالي وولده هذا كان منسدح في الصاله ومعصب مدري وش فيه لما دخلنا طالعنا وماعلق ..
دخل بي خالي المطبخ والا فيه بنت خالتي (س – عندها ولد وبنت متزوجين البنت اللي زوجة ولد خالي - وولد بنت عازبين صغار في العمر ) كان معها بنتها هذي ( اللي زوجه أ ولد خالي ) واختها يعني بنت خالتي الثانيه (ن – عمرها 28- عزباء )
لما دخلنا عليهم كأنهم كأنوا يطبخون وحسيت من ردة فعلهم انه ماكان ودي يشوفوني كذا وخالي حاضني ومبين محبته لي مررره لاني ادري انهم غيورات وحسودات من مواقف كثيره صارت لي منهم الله يهديهم ويكفينا شر من فيه شر ، المهم لما دخلنا وخالي مره كان مبسوط فيني مدري وش قالهم وطلع ..
مديت يدي بأسلم عليهم بديت ببنت خالتي الكبيره س وتسوي نفسها تسولف معي ولفت عني ع أساس مشغوله ما انتبهت لايديني وانا مادتها لمصافحتها ، سكت ومديت يديني لبنتها اللي هي زوجة ولد خالي وأختها ن ونفس الشي برضوه مايبغون يمدون يدينهم لمصافحتي تفآجأت واستغربت كلها مصافحه ماتستاهل وش ماكان اللي بيينا صافحيني وبعدها طنشيني !!
شوي الا جت بنت اختهم الثانيه تقريبا في الثانوي جت تضحك لي وتبتسم لي وعلطول مدت ايدها لي الا تطالعها بنت خالتي س تكون خالتها وتأشرلها قامت بسرعه سحبت ونزلت ايدها قبل ما اصافحها ،
انأ عصبت وقمت اصفق بقووه وانا اضحك بسخريه وأخاطب بنت خالتي س اقولها برافوا برافوا اهنيييك ع اللي فيك لهالدرجه اعوذ بالله واتكلم بصوت عااااااااااااالي كأني ابي الكل يسمع وهي ماكان ودها اني ارفع صوتي تبيني اسكت ..
(للأسف ف الواقع مستحيل اسوي كذا وبهالقوه لكن الله كريم )
انتهت الرؤيا ..

الله يعطيني خيرها وخير مافيها والله يكفيني شرها وشر مافيها
والله يسعدك ويفرج لك ويسخر لك من عنده ...

وعليكم السلام ورحمة الله وبركاته أختي الفاضلة الكريمة نشكر لك دعائكم ولكم مثله
ويدل مجمل الحلم على شدة محبة خالك هذا لك وأن النساء اللاتي ذكرت في المطبخ يغتابونك هداهم الله تعالى
والله تعالى أعلى وأعلم