رؤيا أخافتني كثيييرا ..

السلام عليكم ورحمة الله وبركاته

أرجو تفسير رؤياي الله يوفقك ويعافيك ..

رأيت كأني كنت في غرفة أختي سابقا نفس شكلها الارضيه فرميكا بلاستيك والتسريحه موجوده وعلى ما أعتقد الدولاب وكومدينه بس مافيها سرير ولا سجاده
صايره الغرفه فااااضيه ، المهم شفت كأني كنت جالسه ع الكومدينه وكأن أحد يفرني ويلفني لف قوي وسريع على شكل دائري وانا جالسه على الكومدينه كأنهم
جن بسم الله الرحمن الرحيم يلفوني وكنت احس بتعب والم وأصارخ واشوف اختي
في نفس الغرفة كأن فيه أحد خانقها يرفعها فوق واشوف شعرها تحت كأنه مقلوبه
أو مسدوحه ع جنبها في الهوا بس لفتني شعرها نازل من فوق ونفس الشي كانت
تتألم وما أشوف احد عندها ..

وأنا طولت يبرموني انا والكومدينه بعدها كأني غبت عن الوعي فجأه فتحت عيوني وشفت نفسي طايحه على الارض وتعبانه مرره وقدامي شيخ له لحيه كأنه كأن يقرأ علي قرآن لين صحيت وكان معه شاب يشبه ممثل تركي ما اعرفهم ومدري من وين جوا لما شفتهم قلت للشيخ فيه شي كان يلفني شف الاآثار اللي على الارض وفعلا كان متحدد على الارض شكل دائري بالاسود كأنه من الكومدينه وهي تدور لما كنت فوقها وكان كأنه نصف دائره على الارض والنصف الثاني على الحائط يعني كأني مع الدوران كنت اصعد وأنزل لما شافها الشيخ كان كأنه يسوي نفسه متفآجأ بس حسيت انه عارف وش اللي صاير بعدها مدري وين اختفوا الشيخ والشاب اللي معه طلعت وكأني اشوف الشاب اللي كان معه قدامي وفجأه اختفى ..

بعدها طلعت برا للشارع وكأني في قريه مظلمه مهجوووره مافيها الا نور خافت جدا في السماء بصعوبه اشوف طريقي والطريق مو ممهد ووعر
كأنها قريه للجن بسم الله الرحمن الرحيم وأنا امشي ما أحس أني بلحالي بس ما أشوف أحد كنت خايفه وكل ما امشي من طريق أقول بأوصل للمخرج الا أتوه أكثر ويطلعني مكان ثاني في نفس هالقريه ما قدرت أطلع منها وكنت خااايفه وطول ما أنا امشي أقول بسم الله بسم الله بسم الله

الافجأه أحس كأني سمعت اوتذكرت مدري كأنها امي تقول هم كذا تقصد الجن يتوهون الواحد ويخفون به بعدها مدري هي قالت لي والا انا ذكرت من كلامها المعوذات وقمت اقرآها وأنا اقرأ (قل أعوذ برب الفلق من شر ما خلق ) احس شي يخنقني بقوووه وانا اضغط على نفسي ابغى اكملها وهو يضغط اكثر وحاولت حاولت لين كملتها من كملتها الا علطول شفت باب قدامي على جنب طالع منه نور أصفر ساطع قلت في نفسي الحمد لله لقيت المخرج ورحت أركض له لما طلعت منه كأني طلعت على شارع عام منووور ..

ووقف لي باص صغير كأن السواق سوداني وراكب معه هندي وواحد ناسيه وشو كأنهم عمال حتى كنت مشككه ما ادري هم إنس والا جن بس ما كنت خايفه منهم
المهم وأنا بأركب الا عند عتبة باب الباص شي بارز سحبته كأنه رصاص حق السلاح تفآجات وشفت جنبه مسدس وبسرعه رجعت الرصاص مكانه وكانوا يطالعوني خفت قلت الله يستر شافوني عسي ما يعصبون علي لاني اخذت حقهم وركبت معهم وكأنهم بيرجعوني لديرتي أو اهلي ..

أختي متزوجه وعندها ولدين ..

أنا مطلقه من 8 شهور تقريبا
متخرجه وعاطله
عمري 25 وولدي عمره سنتين و5 شهور

والله يعطينا خير هالرؤيا وخير مافيها والله يكفينا شرها وشر مافيها ..
والله يسعدك ويسخررلك ..

أختي الفاضلة الكريمة
يدل مجمل الحلم على أرواح خبيثة شيطانية تحاول التأثير عليك فحصني نفسك جيدا فلن يضرك شيء بإذن الله تعالى .
ولا تنسي تحصين نفسك بهذا التحصين اليومي وبهذا الحرز والحصن المكين
روى الإمام مسلم : عَنْ أَبِي هُرَيْرَةَ أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ مَنْ قَالَ لَا إِلَهَ إِلَّا اللَّهُ وَحْدَهُ لَا شَرِيكَ لَهُ لَهُ الْمُلْكُ وَلَهُ الْحَمْدُ وَهُوَ عَلَى كُلِّ شَيْءٍ قَدِيرٌ فِي يَوْمٍ مِائَةَ مَرَّةٍ كَانَتْ لَهُ عَدْلَ عَشْرِ رِقَابٍ وَكُتِبَتْ لَهُ مِائَةُ حَسَنَةٍ وَمُحِيَتْ عَنْهُ مِائَةُ سَيِّئَةٍ وَكَانَتْ لَهُ حِرْزًا مِنْ الشَّيْطَانِ يَوْمَهُ ذَلِكَ حَتَّى يُمْسِيَ وَلَمْ يَأْتِ أَحَدٌ أَفْضَلَ مِمَّا جَاءَ بِهِ إِلَّا أَحَدٌ عَمِلَ أَكْثَرَ مِنْ ذَلِكَ وَمَنْ قَالَ سُبْحَانَ اللَّهِ وَبِحَمْدِهِ فِي يَوْمٍ مِائَةَ مَرَّةٍ حُطَّتْ خَطَايَاهُ وَلَوْ كَانَتْ مِثْلَ زَبَدِ الْبَحْرِ .
--------------------------------------
قال ابن القيم رحمه اللہ
أذكار الصباح والمساء بمثابة الدرع كلما زادت سماكته لم يتأثر صاحبه ، بل تصل قوة الدرع أن يعيد السهم فيصيب من أطلقه .
____________________________
والله تعالى أعلى وأعلم