رؤياي..

السلام عليكم ورحمة الله وبركاته

أرجو تفسير رؤياي جزيتم الفردوس الأعلى من الجنة .
رأيت كأني توني بأستقر أو بأسكن عند أهل زوج بنت خالتي(ن) (البنت اسمها ف - عمرها في الثلاثين – متزوجة ابنهم الكبير – عندها 5 بنات وولد ) وكأنهم يبغون يخطبوني لاحد أولادهم والكل كان عارف بس هم مابينوا أي شي ( مع ان ماعندهم الا ولدين زوج بنت خالتي والثاني بعد متزوج وأحفادهم صغار مو في سن زواج !) ، المهم كأني كنت في احد الغرف البس ابغى استعد للذهاب للدوام والبس فستااان سهره طويل بدون اكمام مخصر ولونه سكري ومليان ترتر ذهبي فخمممم ! وتجي بنتهم (ر) تصير اخت زوج بنت خالتي (متزوجه – عندها على ما اعتقد 4 او 5 أولاد ) تجي تضبط شعري وتسوي لي تسريحه ناعمه مرفوعه وكأن لون شعري اسود وبشرتي افتح من الواقع بدرجتين تقريبا المهم مره حبيت التسريحه وشكرتها ونزلت وماحطيت أي مكياج في وجهي كنت احس شكلي كان حلوو ومايحتاج مكياج ، لما نزلت لقيتهم جالسين على السفره ينتظروني (كان البيت افخم من بيتهم في الواقع حتى السفره طويله وفخمه )
*** علاقتنا فيهم كانت مررره قويه في بدايه زواج بنت خالتي بس شوي شوي علشان مشاكل بنت خالتي معهم بين فتره وفتره ومشاغل الدنيا شبه انقطعنا ما نشوف بعض الا من وين لوين بعكس اول ***
المهم جلست وقربوا لي الصحن علشان اغرف واشيل منه في صحني مكونات الصحن كانت شعيريه مكسره صغار ولونها ابيض مطبوخه بالملح صايره كأنها بديل للارز بالنسبه لهم ( بالعكس المعروف ااننا نحط علي الشعيريه سكر ) وجنب هالشعيريه شي ما اذكر وشو اعتقد خضار وستيك لحم ،شلت من هالصحن الشعيريه وكثرت منها لاني حبيت طعمها ومن هالصنف الثاني اللي ما اذكر ايش هو ولما جيت اخذ ستيك اللحم كنت ابي اخذ قطعه وموراضيه تجي معي الا اكثر من قطعه متلاصقه حاولت افصلها لاني كنت حاسه انها كثيييره مره بالنسبه لي ولكمية الشعيريه حاولت افصلها وما قدرت ع ما اعتقد ان اغلبها نزلت بصحني الا قطعه وحده بالقوه فصلتها ورجعتها في صحنهم .
وبديت اكل في الشعيريه الا اشوف في نفس صينيتي (كأن كل شخص امامه صينيه فيها صحونه وكاساته وملاعقه ) باديه او صحن شوربه فيها شوربه بيضاء بالحليب يمكن اقل من ربعها مره قليل اللي فيه شكيت انها مو لي لاحد كان جالس مكاني بعدين شككت انهم غارفينها لي قبل ما انزل بس استغربت انها قليله ، اخذت الملعقه ورشفت منها رشفه صغيره ما كانت سيئة بس كانت باردة تأكدت انها مغروفه من زمان تركتها .
بعدها قمت علشان اروح للدوام وكنت افكر بولدي قالوا خلاص اتركيه احنا بننتبه له شكرتهم وطلعت ما اذكر اني لابسه عبايه وركبت في سيارتهم مع السواق وحتى السياره كانت فخمه بعكس الواقع تماما ، طول الطريق كنت افكر بولدي أتكلم في نفسي أقول يوه نسيت أقول كل فتره خذوه لدورة المياه لانه توه متعلم عليها وينسى نفسه الله يستر ما يوسخ عليهم ، بعدين قلت لا عندهم أطفال اكيد عارفين كيف بيتصرفون معه .
فجأه كأني في بيت خالتي (ن) في الغرفه اللي يجلسون فيها كانت مليانه الغرفه بناتها وامي وانتبهت لشعري وانا داخله انت التسريحه ارتخت في احد الجهتين قلت يوه يبغالي ارتبها ، الا اسمعهم يتكلمون كأنهم بيحظرون زواج يقرب لاهل زوج بنت خالتي اللي كنت عندهم وقالوا لي بتحظرين قلت اممم مدري واشوف بنت بنت خالتي (متزوجه من ولد خالي من مده ) تصير (ف اللي فوق ) خالتها كان شكلها متغير رسمه حواجبها حزينه قلت في نفسي ياحليها غيرت رسمه حواجبها علشان تصير تشبه هذيك الممثله وفعلا صارت تشبه لها بس لاحظت لا البنت فعلااا حزينه ومهمومه ، وأقولهم مدري اروح قالت لا لا تروحين مو لازم تحاول تقنعني اني ما اروح واجلس معها كنت مستغربه (لانها في الواقع ما تحبني وعلاقتنا مو مره )، شوي فكرت بيني وبين نفسي قلت فشله كنت عندهم وماقصروا معي ويبون يخطبوني ولا اروح لمناسبه تبعهم من جد عيب علي ، قلت لامي لالا شكلي باروح الفستان ولابسته من الصبح! والتسريحه ومزينه بس يبي لها ترتيب بس باغسل وجهي واحط ميك اب واكون جاهزه ..

موظفه
مطلقه من سنتين تقريبا
عندي ولد عمره 3سنوات ونص تقريبا
الله يعطيني خير هالرؤيا وخير مافيها والله يصرف عني شرها وشر مافيها ..
والله يسعدك ويوسع لك ويجزاك كل خييير ..