حلمي ببنتي
 

اشوف وكأن بنتي تزوجت ورحت عندها بيتها واشوف بيتها عادي مو ذاك الجمال وكان اثاثه مو جديد بس مرتب .. واشوف كاني متضايقة وماني مرتاحة لزواجها .. واشوف اني مااعرف اسم زوجها ولا اهله ولا اتذكر اي شي عن خطوبتها وزواجها واقول في نفسي مين هذا الرجال ومين اهله .. واشوف كأن بنتي دخلت غرفتها تبغى تنام وفيه شباك كبير اشوفها منه . واشوف انها اخذت كتاب في يدها تبغى تذاكر وتقول انها ماتبغاه يجي ينام جنبها .. انا قلقت عليها وفكرت انها المفترض تتعود عليه وتخليه ينام جنبها والمفترض انصحها واعلمها . وفي نفس الوقت حزنت عليها كيف زوجتها وهي باقي تدرس .. قلت في نفسي ليتني خليتها تخلص دراستها .. واشوف كأني دخلت غرفتهم وهو منسدح جنبها ويبغى ياخذها في حضنه وهي تدفه بيدها وهي نايمه تقول مابغى احد يمسكني وانا نايمه.. وهو يقول عادي تتعودين، وهي رفضت وبعدته عنها ونامت .. شوي اشوف اني جالسه مع بنت عمي في نفس البيت بس غرفه ثانيه. واقول في نفسي ذحين بتقول لو عطيتيني بنتك لولدي افضل من هذول الناس او شي من هذا القبيل .. واحس كأن ممكن تشمت فيني.. قلت لها تصدقين اني ماعرف اسم الرجال ولا اعرف مين اهله ابداا ( اقولها وانا مستغربه ومقهوره ).. هي ضحكت وحسيت ماتبغى تعلق وتحرجني .. وشوي اشوف ام الرجال دخلت علينا وقلت لها تصدقين اني مااعرفكم ! من وين انتم وايش اسم ولدك ! قالت اسمه ( نسيت اسمه ) واحنا من عايله كذا .. المهم عرفتهم وقلت لبنتي ترا ام زوجك تصير بنت عم ابوك من قرية كذا .. وعندك سلفة مره عسل تتعرفين عليها بعدين . احاول اطمن بنتي.. حسيت انهم عايله معروفه وكويسه لكن كان ودي بزواجة افضل لبنتي وبكيت بكى كله حرارة وقهر .. واشوف بنتي تشرب عصير برتقال . وانا قلقانه من زواجها فقمت قريت اية الكرسي والا بنتي فجأه رجعت كل العصير اللي شربته ع الارض مسكت راس بنتي وقلت اهااااا انا كنت متأكده انه ماصار زواج وان هذا مو زوجها .. بنتي فيها شي ( اقصد سحر او عين او حاجة ) اقول في نفسي اجل متى صار هذا الزواج وانا مااتذكر شي !كنت متأكده انه في شي .. جيت بقرا عليها زياده وماعرفت ايش اقرا واحس ناسيه ومتلبكة .. واخذ جوالي وانا ماسكة راسها وابغى اكتب في قوقل ( ايات التحصين ) ومع محاولتين او ثلاث من الغلط في الكتابه كتبتها وطلع لي ايات وسور وماعرفت وش اختار وايش اقرا . في نفس الوقت حسيت بشوية راحة انه بنتي ماتزوجت ولا شي وان الموضوع فيه حاجة .. وصحيت من نومي على مشهد اني ماسكة جوالي وادور ايش اقرا ..
انتهى

الحالة متزوجة وعمري 43 ولا اعمل
وقت الحلم :
الحمدلله صليت الفجر ودعيت لابنائي وقلت الاذكار ونمت وصحيت الساعة التاسعة تقريبا على الحلم

رد: حلمي ببنتي
 

أختي الفاضلة الكريمة أحلام
يدل مجمل الحلم على تخوفك على مستقبل بنتك وفي أمر زواجها
والخوف من زواج الأقارب والخوف الأكثر أنك تزوجينها من غريب فيتشمت منك الأقارب
والنصيحة في أمر زواجها مستقبلا هو عمل الإستخارة والإستشارة والتثبت من معلومات العريس القادم لإبنتك
فماخاب من إستخار ولا ندم من إستشار
والله تعالى أعلى وأعلم